skip to Main Content

༉ འབྲུག་བརྒྱུད་འཕྲིན་ཚད་འདི་ འབྲུག་རྒྱལ་ཁབ་ནང་ བརྒྱུད་འཕྲིན་དང་ཡོངས་འབྲེལ་ཞབས་ཏོག་ དྲག་ཤོས་བྱིན་མིའི་ལས་སྡེ་ཅིག་ཨིན། ལས་སྡེ་འདི་གིས་ བརྒྱུད་འཕྲིན་གྱི་ཞབས་ཏོག་ རྐྱངམ་གཅིག་གིས་མ་ཚད་པར་ བི་-མོ་བཱ་ཡེལ་ཞབས་ཏོག་གི་འོག་ལུ་ མི་སྡེའི་སྡེ་ཚན་འགྲུལ་འཕྲིན་དང་ འབྲུག་ནེཊ་གི་འོག་ལུ་ ཡོངས་འབྲེལ་ཨིན་ཊར་ནེཊ་གི་ཞབས་ཏོག་ཚུ་ཡང་བྱིནམ་ཨིན། འབྲུག་བརྒྱུད་འཕྲིན་ཚད་འདི་ རྒྱལ་ཁབ་ནང་ལུ་ འགྲུལ་འཕྲིན་དང་ཡོངས་འབྲེལ་(ཨིན་ཊར་ནེཊ) གཉིས་ཆ་རའི་ཞབས་ཏོག་བྱིན་མི་ ལས་སྡེ་རྐྱངམ་གཅིག་ཨིན་པའི་ཁར་ བརྒྱུད་འཕྲིན་གྱི་ཞབས་ཏོག་བྱིན་མི་ཡང་ རྐྱངམ་གཅིག་ཨིན།

འབྲུག་བརྒྱུད་འཕྲིན་ཚད་འདི་ སྤྱི་ལོ་༡༩༧༠ ལུ་ འབྲུག་གཞུང་གིས་ བརྒྱུད་འབྲེལ་ལས་ཁུངས་སྦེ་ འགོ་ཐོག་གཞི་བཙུགས་འབད་ཡོདཔ་ད་ སྤྱི་ལོ་༢༠༠༠ ཟླ་༧ པའི་ཚེས་༡ ལས་ རྒྱལ་ཁམས་མངའ་འོག་གི་ལས་སྡེ་སྦེ་ འཕྲོ་མཐུད་དེ་ གཞི་བཙུགས་འབད་ཡི།  རྒྱལ་ཁབ་ནང་ལུ་ ལོ་ངོ་ལྔའི་འཆར་གཞི་ འགོ་དང་པའི་ནང་ དེངས་རབས་ཀྱི་ གོང་འཕེལ་ལས་སྣ་ཚུའི་དོན་ལུ་ སྤྱི་ལོ་༡༩༦༣ ལས་ འགོ་ཐོག་དང་པ་འགོ་བཙུགས་ཅི། དེ་ལས་བཟུང་ འབྲུག་བརྒྱུད་འཕྲིན་ཚད་འདི་ ཉམ་ཆུང་འབད་འགོ་བཙུགས་ཏེ་ ད་ལྟོ་ཚུན་ཚོད་ལུ་ རྒྱལ་ཁབ་མཐའ་དབུས་མེད་པར་ གློག་རྡུལ་ཕྲ་རླབས་(ཌི་ཇི་ཊལ་མའེ་ཀོ་རོ་ཝེབ་)ཡོངས་རྫོགས་བཙུགས་པའི་ཁར་ སྣང་རིག་གི་རྒྱུད་སྐུད་ཀྱི་ རྒྱབ་རྟེན་ཡོངས་འབྲེལ་ཡང་ བཙུགས་ཏེ་ཡོད།

འབྲུག་བརྒྱུད་འཕྲིན་ཚད་ཀྱིས་ ཚོང་འབྲེལ་དང་ མི་སྡེའི་རེ་འདོད་བསྒྲུབ་ཐབས་ལུ་ ལས་སྣ་མ་འདྲཝ་ ལེ་ཤ་འབད་དེ་ཡོད། ད་རིས་འབདཝ་ད་ འབྲུག་བརྒྱུད་འཕྲིན་ཚད་ཀྱི་འོང་འབབ་དང་ཚོང་མགྲོན་པ་ཚུ་ གོང་འཕེལ་འགྱོ་བའི་བསྒང་ར་ཡོད། བི་-མོ་བཱ་ཡེལ་གྱི་ཞབས་ཏོག་འདི་ ཚོང་འབྲེལ་གྱི་ ལས་སྣ་མ་ཚད་པར་ རྒྱལ་ཁབ་ཀྱི་ མཐའ་ཟུར་གཡུས་སྒོ་ཚུའི་ནང་ཡང་ ལྷོད་དེ་ཡོདཔ་ད་ ཡོངས་འབྲེལ་ཞབས༌ཏོག༌འདི༌ རྒེད་འོག་ཉིས་བརྒྱ་བཅུ་མེད་ལྔ་ ག་རའི་ནང་ ཁྱབ་ཚུགས་ཏེ་ཡོད༌ཟེར༌ ཞུ༌ནི༌ཨིན།

འཆར་སྣང་།

གདམ་ཁ་ཅན་གྱི་ལས་སྡེ།

འབྲུག་བརྒྱུད་འཕྲིད་ཚད་འདི་ ལས་འཛིན་གཞུང་སྐྱོང་ ལེགས་ལྡན་གྱི་ཐོག་ལས་ ནམ་ར་ཨིན་རུང་ འགན་ཁྲི་ཅན་སྦེ་ འགན་ཁུར་འབག་སྟེ༌ བརྩོན་ཤུགས་བསྐྱེད་མི་ ལས་སྡེ་ཅིག་ཨིན། ལས༌སྡེ༌གིས་ ལཱ་ ག་ཅི་འབད་རུང་ གཤམ༌གསལ༌ལས༌འཛིན༌གྱི༌ གཞི་རྩ་དང༌ཡིད་མོས་ཀྱི་ ལམ་སྟོན་དང་འཁྲིལ་ཏེ་ འབདཝ་ཨིན།

ལས་འཛིན་དང་འབྲེལ་བའི་གཞི་རྩ།

༡༽       ལག་ལེན་ཆ་མཉམ་གྱི་དོན་ལུ་ ཟུར་རྡོ་བཟུམ་ཅིག་ཨིནམ་ལས་ ས་གནས་ཀྱི་མི་སྡེ་ལུ་ འཇོན་ཐངས་ཅན་དང་ དྲང་བདེན་ དེ་ལས་ འགན་འཁྲི་ཅན་གྱི་ཐོག་ལས་ འགན་ཁུར་འབག་ནི།

༢༽       རྒྱལ་ཁབ་ཀྱི་ གྲོང་གསེབ་དང་ མཐའ་ཟུར་ཚུའི་ནང་ལུ་ བརྒྱུད་འཕྲིན་གྱི་ཞབས་ཏོག་ རྒྱ་བསྐྱེད་འབད་ཐོག་ལས་ དཔལ་འབྱོར་གོང་འཕེལ་ འདྲ་མཉམ་གྱི་གཞི་རྩ་ ཡར་འདྲེན་འབད་ནིའི་ འགན་ཁུར་འབག་ནི།

༣༽       ལས་སྡེའི་ནང་ ལཱ་འབད་མི་ལས་བྱེདཔ་ཚུ་གི་རྒྱུད་ལུ་ ནམ་ར་ཨིན་རུང་ ལཱ་འབདཝ་ད་ སྤྱོད་བཟང་གི་ རྣམ་གཞག་གི་ཐོག་ལས་ འབད་བཅུག་ནི།

༤༽      ལས་བྱེདཔ་ཚུ་ལུ་ ལཱ་གི་ལྕོགས་གྲུབ་རིམ་པ་དང་འཁྲིལ་ འོས་འབབ་དང་ལྡན་པའི་སྤྲོ་འཐུས་དང་ གསོལ་རས་ཚུ་ གནང་ཐོག་ལས་ སེམས་ཤུགས་བསྐྱེད་བཅུག་ནི།

༥༽       ལས་བྱེདཔ་ཚུ་ལུ་ ཤེས་ཡོན་དང་ སྦྱོང་བརྡར་ དེ་ལས་ བསྐྱར་སྦྱོང་ཚུ་བྱིན་ཐོག་ལས་ མི་སྟོབས་ཀྱི་ ལྕོགས་གྲུབ་དང་ འཇོན་ཐངས་ཚུ་ གོང་འཕེལ་གཏང་ནི།

༦༽       ཚོང་མགྲོན་པའི་དགོས་མཁོ་ བསྒྱུར་འགྲོས་དང་འཁྲིལ་བའི་ ཐོན་སྐྱེད་དང་ཞབས་ཏོག་ཚུ་ སོ་སོ་སྦེ་ བྱིན་ནི།

༧༽      གཡོ་སྒྱུ་གི་ཐོག་ལས་ གྱོངས་རྒུད་དང་ ཆད་ལྷག་སོང་མི་ཚུ་ ཚད་འཛིན་འབད་ནིའི་དོན་ལུ་ བྱ་བའི་གནད་རིམ་ཚུ་ ཁ་གསལ་དང་གཏན་གཏན་བཟོ་ཐོག་ལས་ ནང་འཁོད་ཀྱི་འཛིན་སྐྱོང་ལམ་ལུགས་ཚུ་ ལེགས་ཤོམ་སྦེ་ བསྟར་སྤྱོད་འབད་ནི།
དམིགས་དོན།

ང་བཅས་རའི་ ལས་སྡེ་འདི་ འབྲུག་རྒྱལ་ཁབ་ཀྱི་ མི་སེར་ཚུ་ ཕན་ཚུན་འབྲེལ་བ་འཐབ་སྦེ་ བཞག་ཐབས་ལུ་ གསར་གཏད་ཅན་དང་ བློ་གཏད་ཚུགས་པའི་ ཁུངས་ལྡན་གྱི་ བརྡ་དོན་བརྒྱུད་འབྲེལ་(ཨའི་སི་ཊི་) གྱི་ཞབས་ཏོག་ཕུལ་མི་ཅིག་ཨིན།

 

Back To Top